Беларусь і Расія прадставілі ў Парыжы сумесную намінацыю "Мемарыялы героям Вялікай Айчыннай вайны: Брэсцкая крэпасць і Мамаеў курган" на ўключэнне ў Спіс сусветнай спадчыны ЮНЕСКА
15 мая ў Парыжы адбылася ўрачыстая прэзентацыя сумеснай беларуска-расійскай намінацыі "Мемарыялы героям Вялікай Айчыннай вайны: Брэсцкая крэпасць і Мамаеў курган" на ўключэнне ў Спіс сусветнай спадчыны ЮНЕСКА, арганізаванае Пастаянным прадстаўніцтвам Беларусі пры ЮНЕСКА і Пастаянным прадстаўніцтвам Расіі пры ЮНЕСКА. Мерапрыемства, прымеркаванае да 80-годдзя Перамогі ў Вялікай Айчыннай вайне, сабрала шырокую аўдыторыю: прадстаўнікоў дыпламатычнага корпуса, супрацоўнікаў ЮНЕСКА, гісторыкаў, дзеячаў культуры, членаў дыяспары.
У сваім выступленні Часовы павераны ў справах Беларусі ў Францыі Кірыл Грушэўскі падкрэсліў, што перажыты беларускім народам генацыд і вялізныя чалавечыя страты робяць Брэсцкую крэпасць не толькі нацыянальным сімвалам мужнасці і стойкасці, але і важным элементам сусветнай памяці.
Дырэктар дзяржаўнай установы "Мемарыяльны комплекс "Брэсцкая крэпасць-герой", член Савета Рэспублікі Нацыянальнага сходу Рэспублікі Беларусь Аляксандр Каркатадзе расказаў аб унікальнай гісторыка-культурнай значнасці крэпасці, падзяліўся інфармацыяй аб дзяржаўнай палітыцы па яе захаванні, аднаўленні і папулярызацыі.
У зачытаным на мерапрыемстве звароце Міністра культуры Рэспублікі Беларусь Руслана Чарнецкага падкрэслена, што ў Беларусі налічваецца каля 40 тысяч месцаў памяці пра вайну, а Брэсцкая крэпасць займае ў гэтым шэрагу асаблівае месца як міжнародны сімвал супраціўлення і самаахвярнасці.
Упрыгожаннем вечарыны стаў эмацыйны выступ ураджэнкі Беларусі, вядомай актрысы і спявачкі Ірыны Мядзведзевай у суправаджэнні хору музычнай акадэміі Cheremetieff Grad. Выкананне беларускіх і рускіх песень, а таксама чытанне вершаў пра вайну зрабіла глыбокае ўражанне на гасцей мерапрыемства.
Падчас мерапрыемства экспанавалася выстава пра мемарыяльны комплекс «Брэсцкая крэпасць-герой».
Па матэрыялах МЗС Беларусі ў Францыі.
