9 ліпеня 2025 года ў Музеі абароны Брэсцкай крэпасці адбылося адкрыццё выставы "Жывыя радкі вайны". Праект створаны да 80-годдзя Вялікай Перамогі прадстаўнікамі ГА "Беларускі саюз філатэлістаў" Брэсцкае аддзяленне і закліканы захаваць памяць пакаленняў і паказаць гісторыю Вялікай Айчыннай вайны з дапамогай філатэліі.
У гады вайны пошта была жывой ніткай, якая звязвала франтавікоў з родным домам. Лісты, якія дастаўлялі на перадавую, дапамагалі байцам выдужаць і выжыць у самыя цяжкія моманты вайны.
На планшэтах і стэндах выставы прадстаўлены паштовыя канверты і адпраўленні перыяду вайны і акупацыі, лісты ваеннага часу марской і палявой пошты. Матэрыялы выстаўкі закліканы паказаць работу пошты ў складаных умовах ваеннага часу і прадставіць розныя ўзоры паштовых адпраўленняў.
Выстава будзе экспанавацца да сярэдзіны жніўня 2025 года.
