20 чэрвеня 2023 года ў выставачнай зале экспазіцыі «Музей вайны - тэрыторыя міру» адбылася II дыялогавая пляцоўка «Памяць без межаў», ініцыятарам і арганізатарам якой выступіў Інстытут пагранічнай службы Беларусі. Сваім меркаваннем па актуальных пытаннях захавання гістарычнай памяці і патрыятычнага выхавання моладзі ў ходзе дыскусіі падзяліліся эксперты з чатырох краін СНД, а таксама прадстаўнікі навучальных устаноў пагранічнага профілю Казахстана і Расіі.
На плошчы Цырыманіялаў у прысутнасці вайскоўцаў, прадстаўнікоў гарадской улады, прадпрыемстваў, устаноў горада, жыхароў і гасцей Брэста прайшла ўрачыстая цырымонія перапахавання пад мемарыяльныя пліты астанкаў 10 невядомых. Астанкі былі знойдзены ў 2019–2023 гадах ваеннаслужачымі 52-га асобнага спецыялізіраванага пошукавага батальёна Узброеных Сіл Беларусі падчас работ на тэрыторыі Валынскага і Кобрынскага ўмацаванняў Брэсцкай крэпасці.
21 чэрвеня у выставачнай зале экспазіцыі «Музей вайны - тэрыторыя міру» адкрылася выстаўка «Тэрмінова ў нумар!» з фондаў ДБУК «Дзяржаўны музей абароны Масквы», дзе прадстаўлена 46 фатаграфій вядомых франтавых фотакарэспандэнтаў, якія адлюстравалі ход Маскоўскай бітвы. Выстаўка будзе працаваць да 14 жніўня 2023 года. Пасля яе адкрыцця прайшла сустрэча Маладзёжнага парламента пры Заканадаўчым Сходзе Калужскай вобласці з удзельнікамі Маладзёжнага парламента Брэсцкай вобласці. Падчас мерапрыемства выступіла творчая група стваральнікаў мастацкага фільма «Падольскія курсанты», пасля чаго адбыўся паказ карціны.
На плошчы Цырыманіялаў адбыўся ўрачысты старт сумеснага расійска-беларускага патрыятычнага праекта «Цягнік Памяці», які аб’яднаў падлеткаў з Беларусі, Расіі, Арменіі і Кыргызстана.
Ужо традыцыйна каля скульптурнай кампазіцыі «Героям граніцы, жанчынам і дзецям, якія мужнасцю сваёй у неўміручасць зрабілі крок» прайшла VIII Міжнародная маладзёжная патрыятычная акцыя «Баявы разлік» з удзелам курсантаў ДУА «Інстытут пагранічнай службы Рэспублікі Беларусь», пагранічнікаў з Расіі, Казахстана, Арменіі і Таджыкістана, прадстаўнікоў Дзяржпагранкамітэта, Каардынацыйнай службы СКПВ, дэлегацый, пагранічных ветэранскіх арганізацый пагранічнай службы, шматлікіх гледачоў. Штогод у гэты дзень у 19.00 курсанты выстройваюцца з партрэтамі загінулых у першых баях Вялікай Айчыннай вайны абаронцаў Беларускай пагранічнай акругі. Яны называюць імёны герояў, якія апошні раз заступілі ў нарад па ахове Дзяржаўнай мяжы СССР роўна 82 гады таму.
З удзелам курсантаў-пагранічнікаў і кадэтаў Нахімаўскага вучылішча (РФ) прайшла штогадовая акцыя «Бессмяротны гарнізон», падчас якой на тэрыторыі мемарыяла на месцах баёў устаноўлены таблічкі з партрэтамі герояў - абаронцаў крэпасці, запалены свечкі ў памяць аб іх.
У экспазіцыі «Армейскі клуб» адбыліся паказы пластычнай візуалізацыі «Дарогай дзіцячых слёз…» (узорная тэатральная студыя «Чароўны ліхтар» ДУ «БГЦК», г. Брэст), у руінах Белага палаца прайшла канцэртная праграма «Нам Памяць дасталася ў спадчыну!» удзельнікаў аўтапрабегу «Дарогамі Памяці і Подзвігу» («Архангельскі рэгіянальны навучальны пошукавы цэнтр») з удзелам прызёраў конкурсу чытальнікаў ваеннай паэзіі «Аб героях былых часоў» (г. Брэст) і дзіцячай тэатральнай студыі «Пакаленне АРТ» Брэсцкага абласнога тэатра лялек.
У ноч на 22 чэрвеня на плошчы Цырыманіялаў выступіў камерны аркестр Брэсцкай абласной філармоніі з музычнай праграмай «Музыка памяці».
Кульмінацыяй мерапрыемстваў стаў мітынг-рэквіем «Памяці загінулых - будзьце вартыя!» досвіткам 22 чэрвеня. На памятныя мерапрыемствы прыбылі больш за 30 афіцыйных дэлегацый. У іх ліку прадстаўнікі Міністэрстваў абароны Беларусі і Расіі, Дзяржаўнай Думы і Савета Федэрацыі Федэральнага сходу Расіі, Пастаяннага камітэта Саюзнай дзяржавы і іншыя. Гледачам быў паказаны тэатралізаваны пралог, які адсылаў да падзей 82-гадовай даўніны. Пасля члены дэлегацый, ганаровыя госці і ўдзельнікі мітынгу ўсклалі кветкі да Вечнага агню. Пасля завяршэння мітынгу-рэквіему на Кобрынскім умацаванні прайшла ваенна-гістарычная рэканструкцыя абароны крэпасці.
22 чэрвеня ў канферэнц-зале Музея абароны Брэсцкай крэпасці прайшоў круглы стол з удзелам Дзяржаўнага сакратара Саюзнай дзяржавы Расіі і Беларусі Д.Ф.Мезенцава. У ходзе мерапрыемства адбылася прэзентацыя кнігі «Тэрміну даўнасці не маюць» з серыі «Бібліятэка Саюзнай дзяржавы» пра ваенныя злачынствы супраць народаў СССР у гады Вялікай Айчыннай вайны.
